اسلامی حکومت اور اولیا اللہ کا کردار Islami Hukoomat Aur Auliya Allah Ka Kirdar

قارئین کے لیے چند اولیا اللہ کی اشاعتِ دین کے حوالے سے کی گئی خدمات کو پیش کیا جا رہا ہے ۔

سیدّنا شیخ عبد القادر جیلانیؓ 

سیدّنا غوث الاعظم حضرت شیخ عبدا لقادر جیلانیؓ جس دور میں پیدا ہوئے اس وقت یورپ کی عیسائی حکومتیں مسلمانوں کے اقتدار کو ختم کرنے کے درپے تھیں۔ عالمِ اسلام انتشار اور خلفشار کا شکار تھا۔ بہت سی اسلامی حکومتیں ختم ہو چکی تھیں اور جو باقی تھیں وہ اندرونی خلفشار اور اغیار کا نشانۂ ستم بنی ہوئی تھیں۔ مسلمان اپنی طاقت اور وقار کھو رہے تھے ، ان کے عقائد کو کمزور کرنے کی مسلسل کوششیں کی جا رہی تھیں ۔

488ھ جب سیدّنا غوث الاعظمؓ بغداد تشریف لائے دنیائے اسلام طرح طرح کے فتنوں کی آماجگاہ بنی ہوئی تھی۔ فتنہ خلقِ قرآن، اعتزال اور باطنیت کی تحریکیں مسلمانوں کے لیے خطرۂ ایمان بنی ہوئی تھیں۔خلافتِ بغداد روزبروز زوال پذیر ہورہی تھی۔ سلجوقی آپس میں لڑ رہے تھے۔ جس سلطان کی طاقت بڑھ جاتی، بغداد میں اُسی کے نام کا خطبہ پڑھا جاتا۔ عباسی خلیفہ دم نہ مار سکتاتھا۔ ایک طرف باطنیہ تحریک کے پیروکاروں نے ملک میں اودھم مچا رکھا تھاتو دوسری طرف پہلی صلیبی جنگ کا آغاز ہو چکا تھا ۔ یہ خلیفہ مستنصر باللہ کا دورِ حکومت تھا جو 487ھ سے 512ھ تک رہا۔ 

 مسلمانوں کی ڈوبی ہوئی کشتی کو پار لگانے اور دینِ اسلام کو حیاتِ نو بخشنے کے لیے قدرت نے مجددِدین و محی الدین حضرت شیخ عبدا لقادر جیلانیؓ کی صورت میں امتِ مسلمہ کو ایک عظیم مصلح عطا فرمایا۔ آپؓ فقر و طریقت سے آراستہ، مزاجِ شریعت سے آشنا اور کتاب و سنت کے علوم سے مسلح ہو کر میدانِ جہاد میں اترے اور مجالسِ تلقین و ارشاد اور اجتماعاتِ اصلاح و ہدایت کے ذریعے باطل کے خلاف جنگ کا آغازکر دیا۔ آپ ؓکی سب سے بڑی کرامت ’’احیائے دین ‘‘ یعنی دین کو زندہ کرناہے اسی لیے آپؓ کو محی الدین کے لقب سے نوازا گیا ہے ۔ (حیات و تعلیمات سیدّنا غوث الاعظمؓ)

حضرت داتا گنج بخشؒ

حضرت علی ہجویریؒ نے برصغیر پاک و ہند میں اسلام کی روشنی پھیلانے اور گمراہوں کو راہ ِراست دکھانے کی عظیم خدمات سر انجام دیں۔  

حضرت علی ہجویریؒ المعروف داتا گنج بخشؒ حضرت ابراہیم غزنوی کے والد مسعود غزنوی کے دورِ حکومت میں لاہور تشریف لائے اور اپنی بقیہ زندگی یہیں بسر کی۔ لاہور اور اس کے اطراف میں اسلام کا پیغام آپؒ کی کوششوں سے پھیلا۔ حضرت علی ہجویری ؒ جب لاہور تشریف لائے توآپ کی دلنشین تلقین سے متاثر ہو کر پنجاب کے نائب حاکم رائے راجو بھی مسلمان ہو ئے ، ان کا نام شیخ ہندی رکھا گیا ۔(عظیم مسلم شخصیات )

 حضرت علی ہجویریؒ نہایت با عمل مسلمان تھے۔ آپؒ دل کی پاکیزگی اور باطنی صفائی کو بہت اہمیت دیتے تھے۔ آپؒ کی شاہکار تصنیف ’’کشف المحجوب ‘‘ ہے۔ یہ فارسی زبان میں علم تصوف پرایک منفرد کتاب ہے جو گزشتہ کئی صدیوں سے معرفت اور دانائی کے موتی بکھیر رہی ہے اور تشنگانِ راہِ حق کی پیاس بجھا رہی ہے ۔ 

حضرت خواجہ معین الدین چشتیؒ 

حضرت خواجہ معین الدین چشتیؒ کا امتِ مسلمہ پر یہ بڑا احسان ہے کہ انہوں نے برصغیر میں آکر کفر و ظلمت کے اندھیروں میں اسلام کی شمع روشن فرمائی ۔ آپؒ نے تبلیغِ اسلام کا عظیم کارنامہ سر انجام د یا اور اپنے خلفاکو ہندوستان کے مختلف گوشوں میں تبلیغ کی ذمہ داری سونپی۔

آپؒ کے خلفامیں شیخ قطب الدین بختیار کاکیؒ، شیخ حمیدالدین ناگوریؒ جیسے جلیل القدر صوفیا بھی شامل ہیں۔خواجہ صاحبؒ نے صرف مردوں ہی میں نہیں بلکہ خواتین میں بھی تبلیغِ اسلام کے لیے کوششیں فرمائیں۔ اس غرض سے آپؒ نے اپنی بیٹی حافظہ جمال کی تربیت فرمائی۔ 

حضرت خواجہ معین الدین چشتیؒ نے جس شہر کو تبلیغِ دین کا مرکز بنانے کا ارادہ فرمایا وہ اجمیر تھا۔ اس زمانے میں اجمیر سیاسی لحاظ سے بہت اہمیت کا حامل تھا۔ یہاں ہندوؤں کے مشہور اور طاقتورراجاپرتھوی راج کی حکومت تھی۔ ان حالات میں اجمیر کو اپنی تبلیغ واشاعت کا مرکز بنانا آپؒ کی غیر معمولی جرأت اور حوصلے کا مظہر تھا ۔ آپؒ جانتے تھے کہ اس خطے میں بسنے والوں کو اسلام کے نورِ ہدایت کی ضرورت ہے۔ آپؒ کی پرکشش شخصیت، دلکش اندازِ گفتگو اور منفرد اندازِ دعوت و تبلیغ کی بدولت لوگ دور دور سے آپؒ کے پاس کھنچے چلے آتے اور آپؒ سے متاثر ہو کر اسلام قبول کر لیتے۔ آپؒ کی تحریک اور بڑھتی ہوئی شہرت راجا پرتھوی راج کو ایک آنکھ نہ بھا تی تھی۔ اس نے آپؒ کے مریدین کو پریشان کرناشروع کر دیا ۔ اس نے آپؒ کو دھمکی دی کہ وہ آپ کو اجمیر سے نکلوا دے گا۔ اس پر آپؒ نے فرمایا ’’ہم نے پرتھوی راج کو زندہ گرفتار کر کے مسلمانوں کو دے دیا۔ ‘‘آپ کی پیش گوئی درست ثابت ہوئی۔ 588ھ میں شہاب الدین غوری نے ترائن کے مقام پر پرتھوی راج کی فوج پر حملہ کیا جس میں مسلمانوں کو فتح نصیب ہوئی۔ پرتھوی راج گرفتار ہوا اور مارا گیا۔(عظیم مسلمان شخصیات)  

حضرت بہاؤ الدین زکریا ملتانیؒ

حضرت بہاؤ الدین زکریاؒ نے اپنی طویل عمر میں کئی حکمرانوں کے ادوار دیکھے۔ان میں شہاب الدین غوری، قطب الدین ایبک، آرام شاہ، شمس الدین التمش ، ناصر الدین قباچہ ، رکن الدین، رضیہ سلطانہ، معز الدین، بہرام شاہ ، ملک اعزالدین ، علاؤ الدین مسعود اور ناصر الدین محمود شامل ہیں۔ شمس الدین التمش نے تو آپ کو مملکت کا شیخ الاسلام مقرر کر دیا تھا۔یہ بہت بڑا عہدہ تھا جس کا تعلق قاضیوں کے تقرر اورشریعت کے نفاذ سے تھا۔ 

حضرت بہا ؤ الدین زکریا ملتانیؒ کو جنوبی ایشیا میں دعوت و اصلاح  اور تبلیغِ دین کی منظم تحریک کا بانی کہا جاتا ہے۔ آپؒ کی تحریک کی بدولت سندھ، ملتان اور بلوچستان کے علاقوں میں ہزاروں افراد دائرہ اسلام میں داخل ہوئے ۔ حضرت بہاؤ الدین زکریاؒ نے ملحدوں کے خلاف جہاد اور اسلام کی تعلیمات کو عام کرنے اور پاکیزہ معاشرے کو وجود میں لانے کی غرض سے ایک جامع منصوبہ تیار کیا۔ آپ ؒ کی تحریک بڑی ہمہ گیر تھی۔ آپؒ اور آپؒ کے خلفا کی انتھک جدوجہد کی بدولت سندھ و ہند کے کئی علاقے اسلام کی برکتوں اور سعادتوں سے مہک اٹھے تھے۔  (عظیم مسلمان شخصیات)

حضر ت فرید الدین گنج شکرؒ 

حضرت فرید الدین گنج شکرؒ کا سب سے بڑا کارنامہ اسلام کی اشاعت ہے جس کے نتیجے میں مغربی پنجاب کے بہت سے غیر مسلم قبائل اور خاندانوں نے اسلام کی نعمت پائی۔ ان علاقوں میں بسنے والے قبائل راجپوت، سیال، وٹو، کھوکھر ، مرہنگووالیان، بہلیان جکر والیان، بکان، سیان وغیرہ حضرت فرید الدین ہی کی کوششوں سے مسلمان ہوئے۔ (عظیم مسلمان شخصیات)

حضرت فرید الدین گنج شکرؒ کا دوسرا بڑا کارنامہ تبلیغ واصلاح کی تحریک کو منظم کرناہے۔ آپؒ کا طریقہ یہ تھا کہ جو شخص بھی آپؒ کے حلقۂ ارادت میں شامل ہونا چاہتا آپؒ اسے بیعت فرماتے۔ حضرت نظام الدین اولیاؒفرماتے ہیں :
جب بھی کوئی شخص حضرت فرید الدینؒ کی خدمت میں ارادت کی نیت لے کر آتا تو آپؒ اسے ہدایت کرتے کہ پہلے ایک بار سورۃ فاتحہ اور سورۃ اخلاص پڑھو ۔ پھر سورۃ البقرہ کا آخری رکوع تلاوت فرماتے اس کے بعد دیگر چند آیات تلاوت کرتے۔ اس مرید سے وعدہ لیتے تھے کہ وہ اپنے ہاتھ ، پاؤں اور آنکھوں کی حفاظت کرے گااور شریعت کے راستہ پر قائم رہے گا۔ (سیر الاولیا)

حضرت فرید الدینؒ کی مسلسل محنت کا نتیجہ یہ نکلاکہ آپؒ نے صوفیا کرام کی ایک بڑی جماعت تیار کی۔ آپؒ نے اپنے کئی خلفا کو تبلیغِ دین کی ذمہ داری دے کر برصغیر کے مختلف علاقوں میں بھیجا۔ آپؒ کے نامور خلفامیں حضرت نظام الدین اولیاؒ، شیخ جمال الدین ہانسوی، مخدوم علاؤ الدّین صابر شامل ہیں ۔ 

حضرت فرید الدین گنج شکرؒ حکومت کے اہلکاروں اور عہدیداروں سے زیادہ میل جول تو نہ رکھتے تھے لیکن جہاں ضرورت پڑتی وہاں سرکاری عہدیداروں سے رابطہ قائم کرتے تھے اور غلطی پر انہیں ٹوکتے بھی تھے ۔ ایک بار کسی نے آپ سے درخواست کی کہ برصغیر کے حکمران غیاث الدین بلبن کو ایک معاملہ پر ہدایت کر دیں ۔ آپ ؒ نے بلبن کو یہ خط تحریر فرمایا:
میں اس شخص کا معاملہ اللہ تعالیٰ اور اس کے بعد آپ کے سامنے پیش کرتا ہوں، اگر آپ اس کو کچھ دے دیں گے تو حقیقی طور پر عطا کرنے والا اللہ تعالیٰ ہو گا اور آپ مشکور ہوں گے اور اگر آپ نہ دیں گے تو اس کا مانع اللہ تعالیٰ ہو گا اور آپ معذور ہوں گے۔(عظیم مسلم شخصیات)

حضرت نظام الدین اولیاؒ

چشتیہ سلسلے کی وہ تحریک جس کا بیج برصغیر میں حضرت خواجہ معین الدین چشتیؒ نے بویا تھا اورحضرت بابا فرید الدین گنج شکرؒ نے اسے منظم کیا، اس کے بعداس تحریک کومزیدپھیلانے اور مستحکم بنانے کا فریضہ حضرت نظام الدین اولیاؒنے سر انجام دیا۔ حضرت نظام الدین اولیاؒ نے تصوف کے بارے میں پھیلے ہوئے نظریات کی اصلاح فرمائی اور وقتاً فوقتاً تنبیہ کے ذریعے درست اورحقیقی اسلامی نقطۂ نظر اپنے شاگردوں پر واضح کیا۔ آپؒ اپنے مریدوں کو خلافت عطا کرتے ہوئے فرماتے :
’’تارک الدنیا ہو جاؤ اور اہلِ دنیا کی طرف میلان نہ رکھو۔ گاؤں جاگیر قبول نہ کرو اور بادشاہوں سے صلہ نہ لو۔‘‘

آپؒ نے ’’تارکِ دنیا ‘‘کے بارے میں وضاحت یوں فرمائی ’’ترکِ دنیا کے یہ معنی نہیں کہ خود کو برہنہ کر دے مثلاً لنگوٹ باندھ کر بیٹھ جائے۔ صحیح معنی میں ترکِ دنیا یہ ہے کہ لباس پہنے ، کھانے کھائے، جو کچھ میسر آئے استعمال کرے لیکن اسے جمع کرنے کی طرف متوجہ نہ ہو اور اپنے دل کو کسی دنیاوی شے میں الجھا نہ لے۔‘‘ (عظیم مسلم شخصیات )

حضرت نظام الدین اولیاؒ  کی اصلاحی تحریک بڑی ثمربار ثابت ہوئی ۔ اس کے اثرات ہر شعبہ ہائے زندگی تک پہنچے ۔ مشہور مؤرخ مولانا ضیا الدین برنی جو کہ آپؒ کے مرید بھی تھے اپنی کتاب ’’تاریخ فیروز شاہی ‘‘میں لکھتے ہیں :
علاؤالدین خلجی کے زمانے میں حضرت نظام الدین اولیاؒ کی وجہ سے ہزاروں لوگوں نے توبہ کی اور وہ نماز کے پابند ہو گئے۔ آپؒ نے بیعت کا دروازہ ہر خاص وعام پرکھول رکھا تھا۔ حکمران علاؤ الدین خلجی کے محل میں بہت سے افسران اور ملازم ، حضرت نظام الدین اولیاؒ کے مرید تھے۔ طالب علموں میں تصوف اور دینی کتب کے مطالعہ کا رجحان پیدا ہو گیا تھااور دینی کتب کی نقول تیار کرنے اور ان کی فروخت میں اضافہ ہو گیا تھا۔ (عظیم مسلم شخصیات)