حضرت علی کرم اللہ وجہہ کے دورِخلافت کی مشکلات Hazrat Ali r.a kay Dor-e-Khilafat ki Mushkilat

ابنِ خلدون بھی لکھتے ہیں کہ حضرت عباسؓ نے حضرت علیؓ سے فرمایا:
کل آپ پر ہی خون کا الزام لگایا جائے گا۔ (تاریخ ابن خلدون، جلد دوم، ص 378, 379)

اس سے واضح ہوتا کہ حضرت علی کرم اللہ وجہہ جانتے تھے کہ اگر انہوں نے خلافت کو قبول کر لیا تو ان پر حضرت عثمانؓ کے حوالے سے الزام آئے گا۔ لیکن سوال یہ پیدا ہوتا کہ اس کے باوجود حضرت علی کرم اللہ وجہہ خلافت پر کیوں رضامند ہو گئے؟ حالانکہ آپ کے لئے اس میں بہت مشکلات پوشیدہ تھیں۔

حضرت علیؓ اس پیشکش کو قبول نہیں کرنا چاہتے تھے مگر انہیں امتِ مسلمہ کا سفینہ منجدھار میں نظر آ رہا تھا۔ (سیدّنا حضرت علی المرتضی، ص 144)

اس سے واضح ہوتا ہے درحقیقت امتِ مسلمہ کو تفریق اور تباہی سے بچانے کے لئے حضرت علی کرم اللہ وجہہ نے خلافت قبول فرمائی۔ قاضی ابوبکر ابن العربی لکھتے ہیں:
حضرت عثمانؓ کی شہادت کے بعد لوگوں کو بلا امام چھوڑ دینا ممکن نہ تھا چنانچہ امامت ان باقی ماندہ صحابہ کے سامنے پیش کی گئی جن کا ذکر حضرت عمرؓ نے شوریٰ میں کیا تھا مگر انہوں نے اسے ردّ کر دیا اور حضرت علیؓ نے جو اس کے سب سے زیادہ حقدار اور اہل تھے اسے قبول کر لیا تاکہ امت کو خونریزی اور آپس کی پھوٹ سے بچایا جا سکے جس سے دین و ملت کو ناقابل ِتلافی نقصان پہنچ جانے کا خطرہ تھا۔ (احکام القرآن)

حبیب الرحمن صدیقی فاصل دیوبند تاریخ طبری کا اردو ترجمہ کرتے ہوئے لکھتے ہیں:
سیدّنا حضرت علیؓ نے امت کی خدمت سمجھ کر ان (امت مسلمہ) سے بیعت لے لی تا کہ لوگوں کو امن و امان میسر آ جائے۔ (تاریخ طبری، جلد سوم، حصہ دوم، ص 3)

قصاص کا مطالبہ

قصاص کی تحریک کا آغاز حضرت عثمانؓ کی شہادت کے ساتھ ہی شروع ہو گیا۔ یعنی ابھی تجہیز و تکفین بھی پوری طرح سے نہ ہوئی تھی کہ ساتھ ہی قصاص کا مطالبہ شروع کر دیا گیا۔

حضرت علی کرم اللہ وجہہ کی خلافت کے دوران جتنی مشکلات پیش آئیں وہ زیادہ تر قصاصِ عثمانؓ کی تحریک کی وجہ سے تھیں۔ اس لئے یہ ضروری ہے کہ دیکھا جائے کہ کیسے قصاص کے بے ربط دعویٰ نے حضرت علی کرم اللہ وجہہ کو مشکلات میں ڈالا جبکہ حضرت علی کرم اللہ وجہہ خود بھی قصاص چاہتے تھے لیکن ان کی آواز کو پسِ پشت ڈال دیا گیا۔ اس لئے حضرت علی کرم اللہ وجہہ نے اس سلسلے میں خاطر خواہ کوششیں کی یا یوں کہنا چاہیے کہ جتنا ممکن تھا اتنا کام کیا۔ لیکن حضرت علی کرم اللہ وجہہ نے جو اقدام کیے ان کی اہمیت و افادیت سمجھنے کے لئے ضروری ہے کہ اس سازش کی سنگینی کا اندازہ ہو جو حضرت عثمانؓ کے خلاف کی گئی۔ جب تک حالات کا بخوبی اندازہ نہ ہو اس وقت تک حضرت علی کرم اللہ وجہہ کے اقدامات سمجھ نہیں آ سکتے۔ سازشی نظام کے اندر گھس چکے تھے۔ اس کا تفصیلی بیان پہلے لکھا جا چکا ہے اس کو مدنظر رکھنا ضروری ہے۔ ان پیچیدہ اور دگرگوں حالات میں انکوائری کرانا یا قصاص کے اقدامات کرنا آسان نہ تھا بلکہ یہ کہنا چاہیے کہ ممکن ہی نہ تھا کیونکہ نظام کے اندر اور باہر اور ہر سرکاری عہدہ پر کہیں نہ کہیں سازشی براجمان تھے۔ 

قصاص کی زیادہ زور دار تحریک حضرت امیر معاویہؓ کی زیر نگرانی شام سے اٹھی۔ اس تحریک کا تجزیہ کرتے ہوئے علامہ ابوبکر ابن العربی لکھتے ہیں:
جب حضرت علیؓ سے بیعت کر لی گئی تو شام کے لوگوں نے ان کی بیعت قبول کرنے کے لیے یہ شرط لگائی کہ پہلے حضرت عثمانؓ کے قاتلوں کو گرفتار کر کے ان سے قصاص لیا جائے۔ حضرت علیؓ نے ان سے کہا پہلے بیعت میں داخل ہو جاؤ، پھر حق کا مطالبہ کرو، وہ تمہیں مل جائے گا۔ مگر انہوں نے کہا آپ بیعت کے مستحق ہی نہیں ہیں۔ جبکہ ہم قاتلینِ عثمانؓ کو صبح و شام آپ کے ساتھ دیکھ رہے ہیں۔ اس معاملے میں حضرت علیؓ کی رائے زیادہ صحیح تھی اور ان کا قول زیادہ درست تھا کیونکہ اگر وہ اس وقت قاتلینِ عثمانؓ سے بدلہ لینے کی کوشش کرتے تو قبائل ان کی حمایت میں اٹھ کھڑے ہوتے اور لڑائی کا ایک تیسرا محاذ کھل جاتا۔ اس لیے وہ انتظار کر رہے تھے کہ حکومت مضبوط ہو جائے اور تمام مملکت میں ان کی بیعت منعقد ہو لے۔ اس کے بعد باقاعدہ عدالت میں اولیا مقتول کی طرف سے دعویٰ پیش ہو اور حق کے مطابق فیصلہ کر دیا جائے۔ (احکام القرآن بحوالہ خلافت و ملوکیت، ص 126)

جب حضرت عثمانؓ شہید ہو گئے تو نعمان بن بشیرؓ آپ کی خون آلود قمیض اور حضرت نائلہ کی کٹی ہوئی انگلیاں جو حضرت عثمانؓ کے دفاع میں ہتھیلی سے کٹ گئی تھیں، لے کر حضرت معاویہؓ کے پاس پہنچ گئے۔ حضرت معاویہؓ نے وہ قمیض منبر پر رکھ دی اور انگلیاں اس کی آستین میں لٹکا دیں تا کہ لوگ یہ منظر دیکھیں اور آپ نے انہیں انتقام لینے پر برانگیختہ کیا، لوگ منبر کے اردگرد روتے اور کبھی قمیض کو اٹھاتے اور کبھی رکھتے۔ (تاریخ ابن کثیر، جلد چہارم، حصہ ہفتم، ص 228) 

ابنِ خلدون لکھتے ہیں:
نعمان بن بشیرؓ حضرت نائلہؓ زوجہ حضرت عثمانؓ کی انگلیاں اور حضرت عثمانؓ کی خون آلود قمیض لے کر شام چلے گئے۔ (تاریخ ابن خلدون، جلد دوم، ص 377)
ابنِ کثیر نے لکھا ہے:
’’جب حضرت علیؓ کی بیعت کا معاملہ پایہ تکمیل کو پہنچ گیا تو حضرت طلحہ و حضرت زبیرؓ آپ کے پاس آئے اور آپ سے حضرت عثمانؓ بن عفان کے خون کا قصاص لینے کا اورحد قائم کرنے کا مطالبہ کیا۔ حضرت علیؓ نے ان سے وجہ بیان کی کہ ابھی ان خوارج کے مددگار موجود ہیں اس لئے فی الوقت ان سے قصاص لینا ممکن نہیں۔ (تاریخ ابن کثیر، جلد چہارم، حصہ ہفتم، ص 228, 229) 

(جاری ہے)