ماہنامہ سلطان الفقر لاہور اٹھارہ سال مکمل

رپورٹ: ڈاکٹر وسیم اکرم سروری قادری

انسانی تاریخ کا اگر بغور مطالعہ کیا جائے تو یہ بات عیاں ہوتی ہے کہ انبیا کرام نے اپنے ادوار میں مخلوقِ خدا کی اللہ تعالیٰ تک رسائی کی خاطر دعوت و تبلیغ اور درس و تدریس کے لئے نہ صرف رائج روایتی ذرائع استعمال کیے بلکہ موجودہ اور آئندہ دور کی ضرورتوں کو مدنظر رکھتے ہوئے جدت کو اختیار کیا۔ امتِ محمدیہ میں فقرائے کاملین اور بزرگانِ دین نے بھی مرسلین اور انبیا کرام علیہم السلام کی طرح عوام الناس کی معرفتِ حق تعالیٰ تک رہنمائی کے لئے اور اتمامِ حجت کے لیے ہر ذریعہ ابلاغ استعمال کیا۔ 

فقرائے کاملین کی اسی جماعت میں سے یکتائے روزگار فقیر مالک الملکی اور آفتابِ فقر سلطان العاشقین حضرت سخی سلطان محمد نجیب الرحمٰن مدظلہ الاقدس نے بھی عوام الناس کو دعوتِ حق دینے کی خاطر ہر روایتی اور جدید طریقہ استعمال کیا۔ سلطان العاشقین مدظلہ الاقدس سلطان العارفین حضرت سخی سلطان باھوُ رحمتہ اللہ علیہ کے سلسلہ سروری قادری کے اکتیسویں شیخِ کامل اور موجودہ امام ہیں۔ آپ مدظلہ الاقدس دنیا بھر میں فقر کی واحد ترجمان تحریک دعوتِ فقر کے بانی اور سرپرستِ اعلیٰ ہیں۔ آپ مدظلہ الاقدس فقر و تصوف کی تاریخ میں وہ واحد مبارک ہستی ہیں جنہوں نے انتہائی قلیل عرصہ میں کرۂ ارض کے کونے کونے میں ہر خاص و عام کو اللہ تعالیٰ کی معرفت و وصال کی دعوت دی اور اس بابرکت مقصد کے لئے رائج اور جدید ذرائع کا ایسا استعمال فرمایا جس کی مثال تاریخِ انسانی دینے سے قاصر ہے۔ سوشل اور ڈیجیٹل میڈیا کے بھرپور استعمال کے ساتھ ساتھ قلمی دعوت و تبلیغ کی اہمیت سے انکار ناممکن ہے۔ 

سلطان العاشقین حضرت سخی سلطان محمد نجیب الرحمٰن مدظلہ الاقدس نے اگست 2006ء میں ماہنامہ سلطان الفقر لاہور کی اشاعت کا آغاز فرمایا۔ اللہ پاک کے بے انتہا فضل و کرم اور آپ مدظلہ الاقدس کی شب و روز کی مسلسل اور انتھک جدوجہد کے باعث ’’ماہنامہ سلطان الفقر‘‘ لاتعداد طالبانِ مولیٰ کی راہنمائی اور ہدایت کا باعث بنا ہے۔ کثیر تعداد میں لوگوں نے آپ مدظلہ الاقدس کے دست اقدس پر بیعت کی سعادت حاصل کر کے ذکر و تصور اسمِ اللہ ذات کی بے مثال نعمتِ عظمیٰ حاصل کی ہے اور یوں معرفت و وصالِ الٰہی کی جانب باطنی سفر کا عملی آغاز کیا۔ ماہنامہ سلطان الفقر لاہور نہ صرف روحانی و باطنی اسرار و علوم سے آگاہ کرتا ہے بلکہ ایک انسان کی شخصیت اور کردار سازی میں بھی بہت معاون ثابت ہوتا ہے۔ یہ ایک انسان کی روحانی اور اخلاقی اقدار کو بلند کرنے میں بھی مددگار ہے۔ 

ماہنامہ سلطان الفقر دینی علوم، فقر و تصوف، ادبیات اور روحانی فلسفہ کے متعلق معلومات فراہم کرتا ہے۔ اس میگزین کے مضامین سلطان العاشقین مدظلہ الاقدس کی زیرِنگرانی آپ ہی کے تربیت یافتہ مرد و خواتین مریدین تحریر کرتے ہیں جو کہ تحقیق اور اشاعت کے اعلیٰ بین الاقوامی معیار اور موجودہ نوجوان نسل کی ترجیحات کو مدنظر رکھتے ہوئے آسان فہم انداز میں تحریر کئے جاتے ہیں۔ ہر شمارہ متعلقہ ماہ کے اہم واقعات و تواریخ کے ظاہری و باطنی پہلوؤں پر روشنی ڈالتے ہوئے حقائق آشکار کرتا ہے۔ میگزین میں طالبانِ مولیٰ کے تجربات اور مشاہدات بھی شائع کئے جاتے ہیں تاکہ نئے آنے والوں کی راہنمائی ہو سکے۔ اس کے علاوہ شعبہ اطلاعات و نشریات کے تعاون سے تحریک دعوتِ فقر کی تمام سرگرمیوں کو بھی تحریک دعوتِ فقر نیوز کے طور پر شائع کیا جاتا ہے۔ 

ماہنامہ سلطان الفقر بہترین ڈیزائننگ کے ساتھ آرٹ پیپر پر چار رنگوں میں شائع ہونے کے باوجود اپنے ہم عصر شمارہ جات (Magazines) کے مقابلے میں انتہائی کم قیمت ہے۔ 

ماہنامہ سلطان الفقر لاہور کی آفیشل ویب سائٹ پر میگزین آن لائن بھی پڑھا جا سکتا ہے اور پی ڈی ایف فارمیٹ میں ڈاؤنلوڈ بھی کیا جا سکتا ہے۔ اس کے علاوہ ادارہ سے رابطہ کر کے اپنے لئے اور اپنے عزیز و اقارب کے لئے سالانہ ممبرشپ بھی لی جا سکتی ہے۔ 

الحمد للہ یہ میگزین اپنی اشاعت کے 18 سال کامیابی سے مکمل کر چکا ہے اور ادارہ سلطان العاشقین حضرت سخی سلطان محمد نجیب الرحمٰن مدظلہ الاقدس کی بے حد مہربانیوں اور قدم قدم پر آپ مدظلہ الاقدس کی راہنمائی پر بے حد ممنون و مشکور ہے۔ ماہنامہ سلطان الفقر لاہور اپنے قارئین کا بھی تہہ دل سے شکریہ ادا کرتا ہے جنہوں نے اسے بے حد پسند کیا اور اپنی ترجیحات سے نوازا۔