سلطان العاشقین کا تبلیغی دورہ ضلع ننکانہ صاحب و تحصیل جڑانوالہ ضلع فیصل آباد
(رپورٹ: ملک محمد نعیم عباس کھوکھر سروری قادری۔ چیف ایگزیکٹو ماہنامہ سلطان الفقر لاہور)
اسمِ اللہ ذات کے ذکر وتصور اور سلطان الازکار ھُو کا فیض جو پہلے صرف خواص تک محدود تھا‘سلطان العاشقین حضرت سخی سلطان محمد نجیب الرحمن مدظلہ الاقدس نے اس فیض کو ہر کسی کے لیے عام فرما دیا ہے ۔ آپ مدظلہ الاقدس اس فیض کو عام کرنے کے لیے ملک کے طو ل و عرض میں سفر کر رہے ہیں اور لوگوں کو معرفتِ الٰہی کے نور سے منور فرما رہے ہیں۔ مریدین و محبین سلطان العاشقین ہر سال آپ مدظلہ الاقدس کی بارگاہِ اقدس میں اپنے علاقے میں آنے کی درخواست کرتے ہیں۔
تحریک دعوتِ فقر کی انتظامیہ نے ان درخو ا ستوں کو مدِ نظر رکھتے ہوئے مختلف دورے ترتیب دئیے جن میں ایک دورہ 18 جنوری 2019 بروز جمعتہ المبارک کو شروع ہوا۔ دورے میں لاہور سے کافی مریدین نے شرکت کرنے کی درخواست کی۔
مہرپور سیّد والہ ضلع ننکانہ صاحب میں آمد
سلطان العاشقین حضرت سخی سلطان محمد نجیب الرحمن مدظلہ الاقدس کی سرپرستی میں قافلہ صاحبزادہ سلطان محمد مرتضیٰ نجیب صاحب کے ہمراہ لاہور سے 12بجے ضلع ننکانہ کے گاؤں مہر پور سید والہ محمد رضوان سروری قادری کے گھر کی طرف روانہ ہوا۔ تین گھنٹے کی مسافت کے بعد قافلہ گاؤں میں داخل ہوا تو راستے کے دونوں جانب کھڑے لوگ پھولوں کی پتیاں نچھاور کرنے لگے۔ فضا نعرۂ تکبیر، نعرۂ رسالت، نعرۂ حیدری اور سلطان العاشقین زندہ باد سے گونج اُٹھی اور اہلِ علاقہ نے قافلے کا بھر پور استقبال کیا۔ میزبان محمد رضوان سروری قادری نے ہار پہنا کر سلطان العاشقین اور صاحبزادہ سلطان محمد مرتضیٰ نجیب صاحب کا پُرتپاک استقبال کیا۔ گاؤں کے میدان میں محفلِ میلاد کے لیے پنڈال سجایا گیا تھا جو مریدین، محبین اور دیدارِ سلطان العاشقین کے مشتاقین سے کھچا کھچ بھرا پڑا تھا۔ آپ مدظلہ الاقدس کے مسندِ صدارت پر تشریف فرما ہونے کے بعد محفل کا باقاعدہ آغاز تلاوتِ قرآن پاک سے کیا گیا جس کی سعادت مولانا محمد اسلم اعوان سروری قادری نے حاصل کی۔ کلام میاں محمد بخش ؒ پیش کرنے کے لیے محمد ساجد سروری قادری کو اسٹیج پر بلایا گیا۔ اس خوبصورت کلام کو سن کر لوگ داد دئیے بغیر نہ رہ سکے۔ محفل کے دوران لوگ قطار بناکر آپ مدظلہ الاقدس سے ملاقات اور دست بوسی کا شرف حاصل کرتے رہے۔ محمد فاروق ضیا سروری قادری نے دعائے خیر کروائی۔ اختتامِ محفل پر لاتعداد لوگوں نے آپ مدظلہ الاقدس کے دست اقدس پر بیعت کی سعادت حاصل کی اور اسمِ اللہ ذات کی لازوال نعمت حاصل کی۔ بے شمار مرد و خواتین نے بغیر بیعت کے بھی ذکر حاصل کیا۔ بیعت ہونے والے مرد حضرات کو اسمِ اللہ ذات کا ذکر و تصور اور مشقِ مرقومِ وجودیہ کا طریقہ محمد مغیث افضل سروری قادری نے سمجھایا۔ اور بغیر بیعت کے ذکر حاصل کرنے والے مرد حضرات کو ذکر و تصور محمد ساجد سروری قادری نے سمجھایا۔ آخر میں تمام عقیدت مندوں میں لنگر شریف تقسیم کیا گیا اور اہلِ خانہ کی حضور مرشد کریم سے ملاقات کروائی گئی ۔
چک نمبر 378 گ ب حماندکے تحصیل جڑانوالہ میں محمد احسان سروری قادری کے گھر آمد اور استقبال
اس کے بعد قافلہ سلطان العاشقین حضرت سخی سلطان محمد نجیب الرحمن مدظلہ الاقدس اور صاحبزادہ سلطان محمد مرتضیٰ نجیب صاحب کی سرپرستی میں ضلع فیصل آباد کی تحصیل جڑانوالہ کے گاؤں 378 گ ب حماند کے، محمد احسان سروری قادری کے گھر کی طرف روانہ ہو گیا ،378گ ب حماندکے میں جب قافلہ پہنچا تو پورا گاؤں مرشد کریم کے استقبال کے لیے راستے کے دونوں جانب پھول لیے کھڑا تھا۔ گاؤں کی دیواروں پر سلطان العاشقین کی آمد کے پوسٹر آویزاں تھے۔ اہلِ علاقہ سلطان العاشقین کے دیدار کے متمنی تھے اور خوشی سے سلطان العاشقین زندہ باد ، مجددِ دین سلطان العاشقین کے پُر جوش نعرے لگا رہے تھے ۔ محمد احسان سروری قادری نے چائے اور مٹھائی سے مہمانوں کی تواضع کی ۔ اہلِ علاقہ اور گردو نواح کے مردو خواتین نے بیعت اور بغیر بیعت کے اسمِ اللہ ذات کی عظیم نعمت حا صل کر کے معرفتِ الٰہی کے سفر کا آغاز کیا ۔ علاقائی مریدین اور اہلِ علاقہ نے یکے بعد دیگرے سلطان العا شقین سے ملاقات کا شرف حاصل کیا۔
چک نمبر 459 گ ب تحصیل جڑانوالہ میں محمد بابر سروری قادری کے گھر آمد اور استقبال
پھر یہ قافلہ محمد بابر سروری قادری کے گھر 459 گ ب بھولی دی جھوک تحصیل جڑانوالہ ضلع فیصل آباد کی طرف روانہ ہوا گیا ۔ محمد بابر سروری قادری کے گاؤں میں سلطان العا شقین مدظلہ الاقدس کا پھولوں کی پتیوں اور روح پرور نعروں سے پُرتپاک استقبال کیا گیا۔ گاؤں اور گردو نواح سے آنے والے عقیدت مندوں نے کثیر تعداد میں سلطان العاشقین مدظلہ الاقدس سے ملاقات کی جن میں کثیر تعداد نے بیعت کے ساتھ اور بے شمار مرد و خواتین نے بغیر بیعت کے اسمِ اللہ ذات کی نعمت حاصل کی۔ حضور مرشد کریم سے مردو خواتین نے الگ الگ ملاقات فرمائی۔ مرد و خواتین نے آپ مدظلہ الاقدس کی بارگاہ میں اپنی درخواستیں پیش کیں۔ آپ مدظلہ الاقدس نے سب کی بات توجہ سے سنی اور ان سب کے لیے دعا فرمائی۔
چک نمبر 570 گ ب کندیاں تحصیل جڑانوالہ میں محمد ارشد رمضان سروری قادری کے گھر آمد اور استقبال:
محمد بابر سروری قادری کے اہلِ خانہ سے ملاقات کے بعد مرشد کریم سلطان العاشقین حضرت سخی سلطان محمد نجیب الرحمن مدظلہ الاقدس اور صاحبزادہ سلطان محمد مرتضیٰ نجیب صاحب قافلے کے ہمراہ چک نمبر 570 گ ب کندیاں کی طرف روانہ ہوگئے جہاں پر محمد ارشد رمضان سروری قادری نے بڑے شوق اور جذبے سے مہمانوں کے لیے رات کے لنگرشریف اور قیام کا اہتمام کیا ہوا تھا ۔ قافلہ رات تقریباً 9 بجے 570گ ب کندیاں پہنچا تو محمد ارشد رمضان سروری قادری ،شعبہ دعوت کے ممبران اور مقامی افراد نے سلطان العاشقین زندہ باد، امامِ مبین سلطان العاشقین کے پُر جوش نعروں اور پھولوں سے سلطان العاشقین مدظلہ الاقدس کا شاندار استقبال کیا۔سلطان ا لعاشقین حضرت سخی سلطان محمد نجیب الرحمن مدظلہ الاقدس نے بڑی محبت سے سب سے ملاقات فرمائی۔ مہمانوں کی لنگر سے تواضع کی گئی ۔ تزکیۂ نفس اور قربِ الٰہی کے حصول کے لیے کثیر تعداد میں طالبانِ مولیٰ نے بیعت ا ور بغیر بیعت کے اسمِ اللہ ذات کی لا زوال نعمت حاصل کی۔ رات گئے تک ملاقات اور دیدار کرنے والوں کا تانتا بندھا رہا۔ رات کا قیام محمد ارشد رمضان سروری قادری کے گھر میں کیا گیا ۔ محمد ارشد رمضان سروری قادری کا اسی رات نکاح ہوا۔ صاحبزادہ سلطان محمد مرتضیٰ نجیب صاحب ، انتظامیہ اور شعبہ دعوت و تبلیغ نے نکاحِ مسنونہ میں شرکت کی۔
چک نمبر 569 گ ب عبداللہ خان تحصیل جڑانوالہ میں محمد شریف خان سروری قادری کے گھر آمد اور استقبال:
19 جنوری 2019ء بروز ہفتہ صبح ناشتہ اور اہلِ خانہ سے ملاقات کے بعد سلطان العاشقین قافلے کے ہمراہ چک نمبر 569گ ب عبداللہ خان روانہ ہوئے جو کہ زیادہ مسافت پر نہیں تھا۔ چک عبداللہ خان میں محمد شریف خان سروری قادری اور اہلِ علاقہ نے شعبہ دعوت کے ساتھ مل کرپرتپاک استقبال کیا اور مہمانوں کی سوجی کے حلوے اور چائے سے تواضع کی گئی۔
کثیر تعداد میں مردو خواتین نے بیعت کی سعادت حاصل کی اور لاتعداد عقیدتمندوں نے اپنی روحانی ترقی اور باطنی رہنمائی کے لیے بغیر بیعت کے اسمِ اللہ ذات کے ذکر کی پہلی منزل حاصل کی۔ حضور مرشد کریم مدظلہ الاقدس نے اہلِ خانہ کے لیے دُعائے خیر فرمائی۔
چک نمبر566 گ ب نامدار والہ تحصیل جڑانوالہ ملک محمد امیر سلطان سروری قادری کے گھر آمد اور استقبال:
محمد شریف خان سروری قادری کے گھر دعائے خیر کے بعد قافلہ 566 گ ب نامدار والہ ملک محمد امیر سلطان سروری قادری کے گھر کی طرف روانہ ہوا۔ چک نمبر 566گ ب نامدار والہ تحصیل جڑانوالہ ضلع فیصل آباد میں اہلِ علاقہ نے گُل پاشی اور پُر جوش نعروں سے آپ مدظلہ الاقدس کا والہانہ استقبال کیا ۔ ملک محمد امیر سلطان سروری قادری کے گھر میں محفلِ میلادِ مصطفی ؐ کا انعقاد کیا گیا آغازِ محفل تلاوتِ قرآن پاک سے ہوا جس کی سعادت مولانا محمد اسلم اعوان سروری قادری نے حاصل کی ۔ اس کے بعد محمد فاروق ضیا سروری قادری نے ذکرو تصور اسمِ اللہ ذات کی اہمیت، بیعت کی ضرورت اور مرشد کامل اکمل نور الہدیٰ کی پہچان پر جامع بیان حاضرین کی سماعتوں کی نذر کیا۔ اس کے بعد ساجد علی سروری قادری نے سلطان العاشقین حضرت سخی سلطان محمد نجیب الرحمن مدظلہ الاقدس کی شان میں منقبت ’’اللہ کامظہر حق کا نظارہ مرشد ہمارا ‘‘ کا نذرانہ پیش کیا ۔ جس پر حاضرینِ محفل نے پُر جوش انداز میں تکبیرو رسالت کے نعروں سے محفل کی رونق دوبالا کر دی۔ محفل کے اختتام پر محمد فاروق ضیا سروری قادری نے دعائے خیر کروائی اور پھر طالبانِ مولیٰ نے بیعت اور بغیر بیعت کے اسمِ اللہ ذات کا فیض حاصل کیا۔ اور اپنا مقصدِ حیات جاننے کی راہ پرگامزن ہوئے ۔ ملک محمد امیر سلطان سروری قادری نے وسیع لنگر کا انتظام کیا ہوا تھا۔
حاضرین اور مہمان حضرات نے نمازِ ظہر مولانا محمد اسلم سروری قادری کی امامت میں ادا کی اور پھر حاضرین محفل کی تواضع لنگر شریف سے کی گئی۔ ملک محمد امیر سلطان سروری قادری اور ان کے اہلِ خانہ سے ملاقات اور دعائے خیر کے بعد قافلہ بچیانہ منڈی 656/7 گ ب عبدالمجید سروری قادری کے گھر کی طرف روانہ ہو گیا۔
چک نمبر656/7 گ ب بچیانہ منڈی تحصیل جڑانوالہ محمد عبدالمجید سروری قادری کے گھر آمد اور استقبال:
سلطان العاشقین حضرت حضرت سخی سلطان محمد نجیب الرحمن مدظلہ الاقدس، صاحبزادہ سلطان محمد مرتضیٰ نجیب صاحب اور قافلے کے ہمراہ چک نمبر656/7 گ ب بچیانہ منڈی میں محمد عبدالمجید سروری قادری کے گھر پہنچے۔ قافلے پر پھولوں کی پتیاں نچھاور کی گئیں اور سلطان العاشقین زندہ باد، امامِ مبین سلطان العاشقین، نورِ یقین سلطان العاشقین، نعرہِ فقر تحریک دعوتِ فقر کے نعروں سے فضا گونج اُٹھی۔ عبد المجید سروری قادری نے چائے اور مٹھائی سے مہمانوں کی تواضع کی۔ اہلِ علاقہ مرشدِ کریم کے دیدار اور ملاقات کے لیے قطار در قطار عبد المجید سروری قادری کے گھر پہنچنے لگے۔ کثیر تعداد میں عقیدت مندوں نے آپ مدظلہ الاقدس سے بیعت کی درخواست کرتے ہوئے بیعت کی سعادت حاصل کی جنہیں اسمِ اللہ ذات کی نعمت سے نوازا گیا۔ کثیر تعداد میں مرد و خواتین نے بغیر بیعت کے اسمِ اللہ ذات کی نعمت حاصل کی۔ سلطان العاشقین حضرت سخی سلطان محمد نجیب الرحمن مدظلہ الاقدس نے اہلِ خانہ سے ملاقات کی اور ان سب کے لیے دعائے خیرفرمائی۔
چک نمبر561 گ ب مرضی پورہ تحصیل جڑانوالہ میں محمد صدیق سروری قادری اور محمد رفیق سروری قادری کے گھر آمد اور استقبال:
561گ ب مرضی پورہ پہنچنے پر سلطان العاشقین مدظلہ الاقدس کا گلاب کی پتیوں اور نعروں سے بھر پور استقبال کیا گیا۔ راستے کے دونوں جانب قطاروں میں عقیدت مند پھول نچھاور کر رہے تھے اور پُر مسرت چہروں سے مرشد کریم کو خوش آمدید کہہ رہے تھے ۔ محمد صدیق سروری قادری اور محمد رفیق سروری قادری کے گھر میں پُراہتمام لنگر شریف کا انتظام تھا اور قافلے کے قیام کا بہترین انتظام کیا گیا تھا۔ رات گئے تک گاؤں اور گردو نواح کے عقیدتمند سلطان العاشقین سے ملاقات اور آپ مدظلہ الاقدس کا دیدارِ پُرانوار کرنے کے لیے محمد صدیق سروری قادری اور محمد رفیق سروری قادری کے گھر تشریف لاتے رہے اور اپنے قلوب کو دیدارِ سلطان العاشقین سے منور کرتے رہے۔ سلطان العاشقین نے طالبانِ مولیٰ کو بیعت فرمایا اور ان کے لیے دعائے خیر فرمائی۔ سینکڑوں عقیدتمندوں نے بغیر بیعت کے اسمِ اللہ ذات کا تصور اور ذکر حاصل کیا ۔ 20جنوری 2019 بروز اتوار صبح مہمانوں کو پُر تکلف ناشتہ کروایا گیا اور پھر اسی گاؤں میں رہائش پذیر محمد اشفاق سروری قادری اور محمد عاشق سروری قادری کی درخواست پر مرشد کریم ان کے گھروں میں تشریف لے گئے۔ خواتین نے طلع البدر علینا یک زبان پڑھ کر استقبال کیا اور مرشد کریم نے اہلِ خانہ کے لیے دعائے خیر فرمائی ۔ یہاں بھی خواتین و حضرات نے اسمِ اللہ ذات کی نعمت حاصل کی اور دیدارِ سلطان العاشقین سے اپنی آنکھوں اور قلوب کو منور کیا۔ مرضی پورہ سے قافلہ بچیانہ منڈی محسن رضا سلطانی کے گھر کی طرف روانہ ہوا۔
بچیانہ منڈی تحصیل جڑانوالہ میں محسن رضا سلطانی کے گھر آمد اور استقبال:
راستے میں عقیدتمند سلطان العاشقین حضرت سخی سلطان محمد نجیب الرحمن مدظلہ الاقدس کے دیدارِ پُر انوار کے لیے دست بستہ کھڑے تھے۔ محسن رضا سلطانی کے گھر جانے والی گلیو ں کو رنگ برنگی سجاوٹ کی اشیا سے سجایا گیا تھا۔ محسن رضا سلطانی نے مہمانوں کی تواضع چائے اور اُبلے ہوئے انڈوں سے کی اس دوران جوق در جوق محبین اور اہلِ علاقہ ملاقات کے لیے آتے رہے اور رہائش گاہ کے باہر مشتاقین کی قطاریں لگ گئیں ۔ مرشد کریم نے خوش نصیب خواتین و مرد حضرات کو الگ الگ بیعت کیا اور اسمِ اللہ ذات عطا فرمایا۔ کثیر تعداد نے تزکیہ نفس کے لیے بغیر بیعت کے اسمِ اللہ ذات حاصل کیا۔ پورا علاقہ آپ مدظلہ الاقدس کی آمد پر انتہائی خوش تھا اور ایک میلے کا سماں نظر آتا تھا۔ حضور مرشد کریم نے رخصت ہوتے وقت قطار میں موجود تمام عقیدتمندوں سے ملاقات کی اور توجہ اور محبت سے اِن لوگوں کی گذارشات سنیں۔
چک نمبر656/6 گ ب تحصیل جڑانوالہ میں تنویر رشید سروری قادری کے گھر آمد اور استقبال:
اسکے بعد قافلہ تنویر رشید سروری قادری کی رہائش گاہ 656/6 گ ب پہنچا اور یہاں بھی اہلِ علاقہ کا پرتپاک استقبال اور سلطان العاشقین کے لیے محبت اور خوشی کی انتہا دیکھ کر نگاہ دنگ رہ گئی۔ تنویر رشید سروری قادری نے محفل میلاد کا اہتمام کیا تھا۔ جس میں مولانا محمد اسلم اعوان سروری قادری نے تلاوت کے بعد اسمِ اللہ ذات کو حاصل کرنے کی ضرورت اور مرشد کامل اکمل کی اہمیت پر روشنی ڈالی۔ محسن رضا سلطانی نے نعت شریف ’’حضورؐ میری تو ساری بہار آپ سے ہے ‘‘ پڑھ کر اہلِ محفل کے دلوں کو گرما دیا۔ محمد ساجد سروری قادری نے ابیاتِ باھوؒ خوبصورتی سے پیش کیے تو حاضرین منہمک ہو کر سنتے رہے۔ مولانا محمد اسلم اعوان سروری قادری نے دعائے خیر کروائی اسکے بعد طالبانِ مولیٰ مردو خواتین نے حضور مرشد کریم سلطان العاشقین مدظلہ الاقدس کے دستِ اقدس پر بیعت کر کے اسمِ اللہ ذات کی نعمت حاصل کی اور دیگر عقیدتمندوں نے پہلے ذکر کے ساتھ اسمِ اللہ ذات حاصل کیا ۔ اسکے بعد لنگر شریف کا اہتمام کیا گیا اور پھر قافلہ سلطان العاشقین کی زیرِ سرپرستی صاحبزادہ سلطان محمد مرتضیٰ نجیب صاحب کے ہمراہ لاہور کی جانب روانہ ہوا ۔ ضلع فیصل آباد کی علاقائی تنظیموں کے عہدیداران اور میزبان حضرات نے ضلع کی خارجی حدود تک نعروں کی گونج میں قافلے کو خیرباد کہا اور اس طرح سلطان العاشقین حضرت سخی سلطان محمد نجیب الرحمن مدظلہ الاقدس اسمِ اللہ ذات کے فیوض و برکات تقسیم کر کے لاہور سلطان العاشقین ہاؤس شام 5بجے پہنچے اور تمام اہلِ قافلہ نے آپ مدظلہ الاقدس سے مصافحہ کیااور انکا شکریہ ادا کیا ۔
سلطان العاشقین کا تبلیغی دورہ پتوکی ضلع قصور اور رینالہ خورد ضلع اوکاڑہ
(رپورٹ احسن علی سروری قادری۔مینیجنگ ایڈیٹر ماہنامہ سلطان الفقر لاہور)
مجددِ دین سلطان العاشقین حضرت سخی سلطان محمد نجیب الرحمن مدظلہ الاقدس‘ حاملِ امانتِ الٰہیہ، وارثِ فقر اسم اللہ ذات کے فیض کو عام کرنے کے لیے 27 جنوری 2019 بروز اتوار ایک روزہ تبلیغی دورہ پر پتوکی ضلع قصور اور رینالہ خورد ضلع اوکاڑہ تشریف لے گئے۔
سلطان العاشقین مدظلہ الاقدس کی روانگی سے چند روز قبل ہی شعبہ دعوت و تبلیغ کی مقرر کردہ جماعتیں پتوکی اور رینالہ خورد روانہ ہو چکی تھیں۔ حضور مرشد کریم کی آمد سے قبل تمام مریدین و عقیدتمندوں کو سلطان العاشقین مدظلہ الاقدس کی آمد کی اطلاع کر دی گئی تھی کہ مرشد کامل اکمل سلطان العاشقین مدظلہ الاقدس اسمِ اللہ ذات کے فیض کو عام فرمانے کے لیے ان کے علاقہ میں رونق افروز ہوں گے اس لیے سلطان العاشقین مدظلہ الاقدس کی آمد کا بیتابی سے انتظار ہو رہا تھا کہ کب وہ مبارک گھڑیاں آئیں کہ سلطان العاشقین مدظلہ الاقدس کا دیدار نصیب ہو۔
سلطان العاشقین مدظلہ الاقدس کی آمد سے قبل گردو نواح میں جگہ جگہ اشتہارات اور فلیکسز آویزاں کی جا چکی تھیں جس کے ذریعے اہلِ علاقہ کو دعوتِ عام دی گئی کہ سلطان العاشقین مدظلہ الاقدس کی زیارت و ملاقات سے فیض یاب ہونے کے لیے ہر خاص و عام تشریف لا سکتا ہے۔
پتوکی ضلع قصور میں آمد
قافلہ صبح 8 بجے سلطان العاشقین ہاؤس لاہور سے روانہ ہوا۔ اس قافلے میں بہت سے مریدین آپ مدظلہ الاقدس کے ہمراہ تھے۔ اس دن موسم بہت ہی حسین تھا۔ چمکتی دھوپ کے ساتھ خوشگوار مہکتی ہوا سلطان العاشقین مدظلہ الاقدس کی آمد کا پتہ دے رہی تھی۔ دورانِ سفر طالبانِ مولیٰ پر سرشاری کی ایک کیفیت طاری تھی۔
قافلہ تقریباً 09:15 پر محمد تنویر کی رہائش گاہ پر پتوکی کہنہ ضلع قصور پہنچا جہاں نہ صرف مقامی بلکہ گرد و نواح کے شہروں سے بھی مریدین اور عقیدتمندوں کی کثیر تعداد سلطان العاشقین مدظلہ الاقدس کے استقبال کے لیے موجود تھی۔ آپ مدظلہ الاقدس کی سواری کے نمودار ہوتے ہی فضا ’’سلطان العاشقین زندہ باد‘‘ کے نعروں سے گونج اٹھی۔ فضا گلاب کی خوشبو سے معطر تھی اور طالبانِ مولیٰ کے قلوب سلطان العاشقین مدظلہ الاقدس کی محبت و عقیدت سے سرشار تھے۔ مرشد کامل اکمل سلطان العاشقین حضرت سخی سلطان محمد نجیب الرحمن مدظلہ الاقدس کے چہرہ انور پر نظر پڑتے ہی عشاق کی بیقراری کو سکون مل گیا۔ آپ مدظلہ الاقدس کی سواری پر گلاب کی پتیاں نچھاور کر کے اپنے جذبات کی عکاسی کی گئی۔ آپ مدظلہ الاقدس کے وجودِ مسعود کی خوشبو سے طالبانِ مولیٰ اور عشاق نے اپنے قلب و باطن میں ایک سرور محسوس کیا۔ اہلِ علاقہ آپ مدظلہ الاقدس کی پُرنور روحانی شخصیت سے مرعوب ورطۂ حیرت میں گم عاجزی سے کھڑے تھے۔ تکبیر و رسالت کے نعروں اور سلطان العاشقین زندہ باد کی پُرجوش آوازوں سے آپ مدظلہ الاقدس نے محمد تنویر کے گھر میں قدم رنجہ فرمایا۔ محمد تنویر سروری قادری اور ان کے والد نے حضور مرشد کریم کے گلے میں ہار پہنائے اور سلطان العاشقین مدظلہ الاقدس نے انہیں گلے سے لگا کر شرف بخشا۔
محمد تنویر سروری قادری کے گھر مہمانوں اور عقیدتمندوں کے لیے ناشتے کا وسیع اہتمام تھا۔ ناشتے کے بعد مولانا محمد اسلم سروری قادری نے حاضرینِ محفل میں اسم اللہ ذات کی اہمیت اور مرشد کامل اکمل کی ضرورت پر ایک جامع بیان حاضرین کے گوش گزار کیا۔ بیان کے ختم ہونے پر حضور مرشد کریم سلطان العاشقین محفل میں تشریف لائے تو فضا ایک مرتبہ پھر امامِ مبین سلطان العاشقین کے نعروں سے گونج اٹھی۔ تمام حاضرین نے کھڑے ہو کر ادب و احترام سے سلطان العاشقین کا محفل میں استقبال کیا۔ سلطان العاشقین مدظلہ الاقدس کے جلوہ افروز ہوتے ہی محفلِ حمد و نعت کا آغاز کیا گیا جس میں مولانا محمد اسلم سروری قادری نے تلاوتِ قرآن کی سعادت حاصل کی۔
جس کے بعد ساجد علی سروری قادری نے نعت شریف کا نذرانہ پیش کیا جسے حاضرین نے داد دیتے ہوئے خوب سراہا اور اپنے قلوب کو عشقِ رسولؐ سے سرشار محسوس کیا۔
نعت شریف کے بعد محسن رضا سلطانی نے حضور مرشد کریم سلطان العاشقین کی شان میں منقبت کا گلدستہ پیش کرنے کی سعادت حاصل کی اور خوب داد وصول کی۔ سلطان العاشقین زندہ باد، امامِ مبین سلطان العاشقین کے ولولہ انگیز نعرے بھی حاضرین کے وجود میں جوش بھرنے کے لیے کافی تھے۔
منقبت کے بعد ساجد علی سروری قادری نے ابیاتِ باھُوؒ سامعین کی سماعتوں کی نذر کیے۔
آخر میں مولانا محمد اسلم سروری قادری نے دعا کروائی۔
حاضرینِ محفل میں سے کثیر تعداد میں عقیدتمندوں اور راہِ حق کے متلاشیوں نے مرشد کامل اکمل کے دستِ اقدس پر بیعت کی سعادت حاصل کی اور آپ کی غلامی کا طوق گلے میں ڈالا اور سلطان العاشقین مدظلہ الاقدس نے لطف و کرم فرماتے ہوئے انہیں ذکر و تصور اسم اللہ ذات کی نعمتِ عظیم سے نوازا اور ان کے لیے راہِ فقر پر استقامت کے لیے دعا فرمائی۔
کثیر تعداد میں عقیدتمندوں نے اپنے تزکیہ نفس اور باطنی ترقی کے لیے اسم اللہ ذات کے ذکر کی پہلی منزل بغیر بیعت کے حاصل کی۔
مرد حضرات کے قلوب کو انوار و تجلیات سے منور فرمانے کے بعد سلطان العاشقین مدظلہ الاقدس نے گردونواح سے ملاقات کی غرض سے حاضر ہونے والی خواتین سے ملاقات فرمائی اور راہِ فقر پر سفر کر کے اللہ کا قرب و وِصال حاصل کرنے کی خواہشمند خواتین نے سلطان العاشقین مدظلہ الاقدس کے دستِ اقدس پر بیعت کی سعادت حاصل کی۔ انہیں بھی ذکر و تصور اسم اللہ ذات اور مشقِ مرقومِ وجودیہ سے نوازا گیا۔
پتوکی ضلع قصور میں اسم اللہ ذات کے فیض کو عام فرمانے کے بعد سلطان العاشقین مدظلہ الاقدس قافلہ کے ہمراہ چک نمبر 2/1L تحصیل رینالہ خورد ضلع اوکاڑہ میں تشریف لے گئے۔
چک نمبر 2/1L تحصیل رینالہ خورد ضلع اوکاڑہ میں آمد
دوپہر تقریباً 12:30 پر قافلہ سلطان العاشقین حضرت سخی سلطان محمد نجیب الرحمن مدظلہ الاقدس کی زیرِ قیادت چک نمبر 2/1L تحصیل رینالہ خورد ضلع اوکاڑہ میں محمد سفیان سروری قادری کے گھر پہنچا جہاں عقیدتمند اور اہلِ علاقہ سلطان العاشقین مدظلہ الاقدس کے پُرتپاک استقبال کے لیے بیتاب تھے۔ سلطان العاشقین مدظلہ الاقدس کی سواری کے نظر آتے ہی عقیدت مند قطار در قطار پھولوں کی پتیاں تھامے کھڑے ہو گئے۔ ’’سلطان العاشقین زندہ باد، امامِ مبین سلطان العاشقین، مجددِ دین سلطان العاشقین‘‘ کے فلک شگاف نعروں کے ساتھ مرشد کامل اکمل جامع نور الہدیٰ سلطان العاشقین حضرت سخی سلطان محمد نجیب الرحمن مدظلہ الاقدس کا پُرتپاک استقبال کیا گیا۔
سلطان العاشقین مدظلہ الاقدس کی پنڈال میں آمد سے قبل محمد فاروق ضیا سروری قادری نے ایک مرتبہ پھر اہلِ علاقہ میں سلطان العاشقین مدظلہ الاقدس کا تفصیلاً تعارف کروایا اور اسمِ اللہ ذات کے فیوض و برکات کے متعلق مفصل بیان کیا۔ اپنے بیان میں انہوں نے حاضرین کو دعوت دی کہ وہ حضور مرشد کریم سلطان العاشقین مدظلہ الاقدس کی اس علاقہ میں آمد کو خوش قسمتی سمجھیں اور ان کے دستِ اقدس پر بیعت کی سعادت حاصل کریں اور بیعت کے بعد اسمِ اللہ ذات کا ذکر و تصور حاصل کر کے اپنی ظاہری و باطنی اصلاح اور راہِ معرفت و قربِ حق اختیار کر کے راہِ فلاح اختیار کریں۔
اس کے بعد محفل میں سلطان العاشقین مدظلہ الاقدس کی آمد ہوئی اور فضا ایک مرتبہ پھر سلطان العاشقین مدظلہ الاقدس کے بلند نعروں سے گونج اٹھی۔ حضور مرشد کریم کے سٹیج پر جلوہ افروز ہوتے ہی حاضرین نے فرداً فرداً سلطان العاشقین مدظلہ الاقدس کی دست بوسی کا شرف حاصل کیا۔ عقیدتمند حضور مرشد کریم کے دیدارمیں محو قلبی سکون کی کیفیات محسوس کر رہے تھے۔ اس خوشگوار موسم اور مہکتی فضا میں محفلِ حمد و نعت کا آغاز کیا گیا۔
نقابت کے فرائض ملک محمد نعیم عباس کھوکھر ‘ منتظمِ اعلیٰ تحریک دعوتِ فقر‘ نے انجام دیے۔
تلاوتِ قرآن کے لیے انہوں نے مولانا محمد اسلم سروری قادری کو دعوت دی کہ وہ تلاوتِ قرآن کی سعادت حاصل کریں۔
محسن رضا سلطانی نے نعت شریف کا نذرانہ آقا پاک علیہ الصلوٰۃ والسلام کی بارگاہ میں پیش کیا۔
محمد رمضان باھُو نے حضور مرشد کریم کی شان میں لکھی گئی منقبت ’’یہ نظر میرے پیر کی‘‘ کا نذرانہ پیش کیا جسے خوب سراہا گیا۔
آخر میں ساجد علی سروری قادری نے حضور علیہ الصلوٰۃ والسلام کی شان میں نعت شریف کا ہدیہ پیش کیا اور ابیاتِ باھُو حاضرین کی سماعتوں کی نذر کیے۔
محمد فاروق ضیا سروری قادری نے دعا کروائی ۔
دعا کے بعد حضور مرشد کریم نے بیعت کے خواہشمند افراد کی کثیر تعداد کو بیعت فرما کر اپنی غلامی کا شرف بخشااور انہیں ذکر و تصور اسمِ اللہ ذات اور مشقِ مرقومِ وجودیہ کی لازوال دولت سے نوازا۔
اس کے ساتھ ہی بغیر بیعت کے سینکڑوں افراد نے اپنے نفس کی اصلاح اور درستگی کے لیے بغیر بیعت کے اسمِ اللہ ذات کی پہلی منزل کا ذکر حاصل کرنے کی سعادت حاصل کی۔
تزکیۂنفس اور تصفیۂ قلب کے اس سفر میں خواتین بھی پیچھے نہیں۔ مرد حضرات کے بعد خواتین کی کثیر تعداد بھی سلطان العاشقین مدظلہ الاقدس کی نورانی شخصیت کے دیدار اور آپ مدظلہ الاقدس کے دستِ اقدس پر بیعت کے لیے بیتاب تھیں۔ حضور مرشد کریم نے انہیں بیعت فرما کر ان کی بیتابی کو قرار بخشا اور ذکر و تصور اسمِ اللہ ذات جیسی لازوال دولت و نعمت عطا فرماتے ہوئے راہِ فقر پر استقامت کی دعا بھی فرمائی۔
حاضرینِ محفل اور تمام مریدین و عقیدتمندوں میں لنگر پاک تقسیم کیا گیا۔
لنگر تناول کرنے کے بعد سلطان العاشقین مدظلہ الاقدس نے مریدین و عقیدتمندوں کے ہمراہ نمازِ ظہر ادا فرمائی۔
محمد سفیان سروری قادری کے اہلِ خانہ سے ملاقات اور ان کے لیے دعائے خیر فرمانے کے بعد قافلہ لاہور واپسی کے لیے روانہ ہوا اور تقریبا 05:30 پر لاہور پہنچا۔ ہزاروں لوگوں کو اپنے نورانی وجود کے فیوض و برکات سے نوازنے کے بعد ایک روزہ تبلیغی دورہ اپنے اختتام کو پہنچا۔
عرس مبارک سلطان العارفین حضرت سخی سلطان باھُوؒ . منعقدہ :10 فروری 2019ء بروز اتوار
(رپورٹ: احسن علی سروری قادری۔ مینیجنگ ایڈیٹر ماہنامہ سلطان الفقر لاہور)
سلطان العارفین حضرت سخی سلطان باھُو رحمتہ اللہ علیہ کے عرس مبارک کی تقریب 10 فروری 2019ء بروز اتوار خانقاہ سلسلہ سروری قادری میں سلطان العاشقین حضرت سخی سلطان محمد نجیب الرحمن مدظلہ الاقدس کی زیرِ صدارت منعقد کی گئی۔ اس تقریبِ سعید میں پاکستان کے مختلف شہروں سے مریدین اور عقیدتمندوں نے شرکت کی۔
سلطان العاشقین حضرت سخی سلطان محمد نجیب الرحمن مدظلہ الاقدس کی خانقاہ سلسلہ سروری قادری میں آمد پر پُرجوش استقبال کیا گیا۔ مسندِ صدارت پر جلوہ افروز ہونے کے بعد محفل کا باقاعدہ آغاز کیا گیا جس میں نقابت کے فرائض ملک محمدنعیم عباس کھوکھر سروری قادری نے انجام دئیے۔ دورانِ محفل مریدین اور عقیدتمندوں نے فرداً فرداً حضور مرشد کریم سلطان العاشقین حضرت سخی سلطان محمد نجیب الرحمن مدظلہ الاقدس کی دست بوسی کا شرف حاصل کیا۔
* ملک محمد نعیم عباس کھوکھر سروری قادری نے حمد و ثنا سے نقابت کا آغاز کرتے ہوئے سلطان العارفین حضرت سخی سلطان باھُو رحمتہ اللہ علیہ کا تعارف کروایا۔
* تلاوت کی سعادت مولانا محمد اسلم سروری قادری نے حاصل کی۔
* حضور علیہ الصلوٰۃ والسلام کی بارگاہِ ناز میں ہدیہ نعت کا نذرانہ ساجد علی سروری قادری نے نہایت محبت و عقیدت سے پیش کیا۔
اسی بے خودی میں کہیں کھو نہ جاؤں
تڑپ کملی والے کی تڑپا رہی ہے
* اس کے بعد محسن رضا سلطانی نے سلطان العارفین حضرت سخی سلطان باھُو رحمتہ اللہ علیہ کی بارگاہ میں منقبت کا نذرانہ پیش کیا:
میرے سوہنے سائیں حق باھُوؒ
سدا ہے تیری اللہ ھُو
اس خوبصورت منقبت نے دلوں میں سرور بھر دیا اور حاضرین نے محسن رضا سلطانی کو خوب داد دی۔
* منقبت کے بعد ملک محمد نعیم عباس کھوکھر نے مولانا محمد اسلم سرور ی قادری کو دعوت دی تاکہ وہ حضرت سخی سلطان باھُوؒ کی حیاتِ مبارکہ پر ایک جامع بیان حاضرین کے گوش گزار کریں۔
* مولانا محمد اسلم سروری قادری نے بہت خوبصورت انداز میں سلطان العارفین حضرت سخی سلطان باھُو رحمتہ اللہ علیہ کی ولادت، حیاتِ مبارکہ، بلند مقام و مرتبہ اور ظاہری و باطنی بیعت پر بیان کیا اور اس کے ساتھ انہوں نے حضرت سخی سلطان باھُوؒ کی تعلیمات اور سلسلہ قادری کے جاری فیض کے بارے میں حاضرین کو بتایا۔
* محمد رمضان باھُو نے ابیاتِ باھُو کا نذرانہ پیش کیا۔
* مولانا محمد اسلم سروری قادری نے ختم شریف پڑھنے کی سعادت حاصل کی اور دعا کروائی۔
* آخر میں ساجد علی سروری قادری اور محسن رضا سلطانی نے آقا پاک علیہ الصلوٰۃ والسلام کی بارگاہ میں درود و سلام کا نذرانہ پیش کیا۔
* ملک محمد نعیم عباس کھوکھر سروری قادری نے 21 مارچ کو منعقد ہونے والی محفل میلادِ مصطفی بسلسلہ یومِ منتقلی امانتِ الٰہیہ میں بھرپور شرکت کی حاضرین کودعوت دی۔
سلطان العاشقین حضرت سخی سلطان محمد نجیب الرحمن مدظلہ الاقدس کی غلامی کا طوق گلے میں ڈالنے کو بیتاب افراد نے سلطان العاشقین مدظلہ الاقدس کے دستِ اقدس پر بیعت کی سعادت حاصل کی اور مرشد کامل اکمل سلطان العاشقین مدظلہ الاقدس نے بیعت کے بعد انہیں اسم اللہ ذات عطا فرمایا جس کا ذکر اور تصور معرفت و قربِ الٰہی کے لیے بہت ضروری ہے۔
سلطان العاشقین نے رخصت ہونے سے قبل تمام حاضرین اور مریدین سے فرداً فرداً ملاقات فرمائی اور سب کے لیے دعائے خیر فرمائی۔
تمام مہمانوں اور مریدین کے لیے خصوصی طور پر تیار کیا گیا لنگر پاک تقسیم کیا گیا۔ اس طرح یہ پُرنور روحانی محفل اختتام پذیر ہوئی۔
سلطان الفقر پبلیکیشنز لاہور بک فیئر ایکسپو سنیٹر 2019
سلطان الفقر پبلیکیشنز لاہور نے یکم تا پانچ فروری 2019ء ایکسپو سینٹر لاہور میں منعقد ہونے والے بک فیئر میں شرکت کی۔ اس بک فیئر (کتاب میلہ) کا انعقاد لاہور انٹرنیشنل بک فیئر نے کیا۔
اس بک فیئر (کتاب میلہ) میں سلطان الفقر پبلیکیشنز نے نہایت جوش و خروش سے شرکت کی۔ سلطان الفقر پبلیکیشنز کے سٹال کو بہت ہی خوبصورت انداز میں سجایا گیا۔ مختلف سائز میں فلیکسز بنوا کر سٹال پر آویزاں کی گئیں اور کتب کے تعارف کے لیے مختلف سٹینڈیز بنوائی گئیں جن کو ہال کے اندر مختلف مقامات پر ڈسپلے کیا گیا۔
سٹال پر سلطان العارفین حضرت سخی سلطان باھُوؒ کی کتب جن کا فارسی سے اردو اور فارسی سے انگریزی میں ترجمہ کیا گیا ہے اور اس کے ساتھ سلطان العاشقین حضرت سخی سلطان محمد نجیب الرحمن مدظلہ الاقدس کی تحریر کردہ کتب اور ان کے انگریزی زبان میں تراجم کو نمایاں طور پر ڈسپلے کیا گیا۔
سلطان الفقر پبلیکیشنز کے سٹال پر آنے والے تمام مرد و خواتین کو بہت اچھے انداز میں خوش آمدید کہا گیا اور ان کو نہ صرف کتب کا تعارف کروایا گیا بلکہ سلطان العاشقین حضرت سخی سلطان محمد نجیب الرحمن مدظلہ الاقدس کی جدوجہد اور کاوشوں کے متعلق بتایا گیا کیونکہ یہ تمام کتب اور سلطان الفقر پبلیکیشنز کی تمام کاوشیں سلطان العاشقین حضرت سخی سلطان محمد نجیب الرحمن مدظلہ الاقدس کی نظرِ کرم اور فیضانِ نظر کا ہی نتیجہ ہیں۔ تمام وزیٹرز کو تحفتاً ماہنامہ سلطان الفقر لاہور کا ایک ایک شمارہ پیش گیا جس پر تمام وزیٹرز بہت خوش ہوئے اور شکریہ ادا کیا۔اس کے علاوہ بک فیئر (کتاب میلہ)میں آنے والے تمام مرد و خواتین میں پمفلٹ تقسیم کیے گئے جن پر تمام سوشل میڈیا لنکس اور ویب سائٹ لنکس موجود تھے تاکہ سلطان الفقر پبلیکیشنز کی تمام کتب کا آن لائن مطالعہ کیا جا سکے اور فقر کی تعلیمات دنیا بھر میں عام ہو جائیں۔
اہلِ تصوف اور عقیدتمند مرد و خواتین نے سلطان الفقر پبلیکیشنز کے سٹال کی بہت تعریف کی اور کتابوں کے اعلیٰ معیار کو بہت سراہا۔ سلطان الفقر پبلیکیشنز کی کتب اپنی طباعت و اشاعت میں ایک خاص معیار رکھتی ہیں اور ان کتب کو نہایت عمدہ کاغذ پر شائع کروایا جاتا ہے تاکہ قاری کو کتب کے مطالعہ میں دشواری نہ ہو۔
بک فیئر (کتاب میلہ)کے لیے سلطان الفقر پبلیکیشنز نے خاص طور پر 50 فیصد ڈسکاؤنٹ کا اعلان کیا ہوا تھا تاکہ زیادہ سے زیادہ لوگ ان کتب سے مستفید ہو سکیں۔ اس بنا پر سینکڑوں لوگوں نے سلطان الفقر پبلیکیشنز کے سٹال سے کتب خریدیں۔
شائقین نے سلطان الفقر پبلیکیشنز کی کاوشوں کو بہت سراہا اور ان کتب کو بہت پسند کیا۔ بہت سے عقیدتمندوں نے سلطان العاشقین مدظلہ الاقدس سے ملاقات کے لیے درخواست بھی کی اور فقر کے متعلق مزید جاننے کے لیے مختلف سوالات بھی کیے۔ ان سب کے سوالات کے مناسب اور اچھے انداز میں جوابات دئیے گئے جس پر شائقین نہایت مشکور ہوئے۔
سٹال پر ڈیوٹی کے فرائض احسن علی، محمد راشد گلزار، شیر علی اور محمد عامر نے انجام دئیے۔ اس کے علاوہ ڈاکٹر عبدالحسیب سرفراز، ڈاکٹر محمد حامد جمیل، پروفیسر حماد الرحمن، حافظ وقار احمد، محمد رشید اور محمد احسان کا تعاون بھی حاصل رہا۔
سلطان الفقر ڈیجیٹل پروڈکشنز کی طرف سے سعید جعفر، محمد شہزاد، عبدالرحمن محبوب اور احسن رضا کا تعاون حاصل رہا جنہوں نے خوبصورت انداز میں پانچ روز سلطان الفقر پبلیکیشنز کے سٹال کی نہ صرف فوٹو کوریج کی بلکہ ویڈیوز بھی بنائیں۔
اس کے ساتھ سلطان الفقر پبلیکیشنز کے چیف ایگزیکٹو ملک محمد نعیم عباس کھوکھر سروری قادری کا تعاون بھی شامل رہا اور ان سب سے بڑھ کر حضور مرشد کریم سلطان العاشقین حضرت سخی سلطان محمد نجیب الرحمن مدظلہ الاقدس کی باطنی مہربانی شاملِ حال رہی۔ سلطان الفقر پبلیکیشنز کی ٹیم نے ان سب کے خلوص کا شکریہ ادا کیا اور سب کے تعاون کو سراہا۔ اللہ پاک انہیں جزائے خیر عطا فرمائے۔ آمین
پاکستان بھر سے تحریک دعوتِ فقر کی خبریں
تحریک دعوتِ فقر (رجسٹرڈ) روئے زمین پر واحد اللہ کی جماعت ہے جو معرفتِ الٰہی اور حضورِ حق جیسے اعلیٰ ترین باطنی مراتب کی دعوت و تبلیغ کی علمبردار ہے اور گمراہی کے اس دور میں بھی مخلوقِ خدا کا تعلق خدا سے جوڑنے کے لیے کوشاں ہے۔ تحریک دعوتِ فقر کا مرکزی دفتر، جو کہ سلطان الفقر ہاؤس 4-5/A ایکسٹینشن ایجوکیشن ٹاؤن وحدت روڈ لاہور میں واقع ہے، امر بالمعروف اور نہی عن المنکر کے پیغام کو عام کرنے کے لیے دورِ جدید کے تقاضوں کو ملحوظِ خاطر رکھتے ہوئے ہر کوشش جاری رکھے ہوئے ہے۔
بانی و سر پرستِ اعلیٰ تحریک دعوتِ فقرسلطان العاشقین حضرت سخی سلطان محمد نجیب الرحمن مدظلہ الاقدس نے معرفتِ الٰہی کے اس پیغام کو عام کرنے کے لیے تحریک دعوتِ فقر کے علاقائی دفاتر بھی قائم فرمائے ہیں جو کہ اپنے اپنے علاقہ میں بھرپور تگ و دو کر رہے ہیں اور ہر خاص و عام کو اپنے اپنے انداز، شوق اور لگن کے مطابق اللہ ربّ العزت کی پہچان اور معرفت کی طرف دعوت دے رہی ہیں۔ پاکستان بھر سے تحریک دعوتِ فقر کی خبریں شائع کی جار ہی ہیں۔
تحریک دعوتِ فقر اسلام آباد
18جنوری2019ء بروز جمعہ ناصر مجیدسروری قادری کے گھر پر دعوتِ فقر اور سلطان العاشقین حضرت سخی سلطان محمد نجیب الرحمن مدظلہ الاقدس کی تصنیفِ مبارکہ ’’شمس الفقرا‘‘ سے درس کا اہتمام کیا گیا ۔اہلِ علاقہ نے اُن کی اس کاوش کو خوب سراہا اور مستقبل میں بھی اس قسم کی محافل منعقد کرنے کا اصرار کیا۔ (رپورٹ: ناصر مجیدسروری قادری)
تحریک دعوتِ فقر کالا گجراں جہلم
* 08 فروری 2019ء جمعتہ المبارک کے موقعہ پر جامع مسجد کالا گجراں جہلم میں سلطان الفقر پبلیکیشنزکی مطبوعہ کتب کابک سٹال لگایا گیا۔ سلطان العاشقین حضرت سخی سلطان محمد نجیب الرحمن مدظلہ الاقدس کی کتب ’حقیقتِ اسمِ اللہ ذات ‘ اور ’مرشد کامل اکمل ‘ خاص طور پر لوگوں کی توجہ کا مرکز بنی رہیں۔ (رپورٹ: ظفراقبال سروری قادری)
ُتحریک دعوتِ فقر اوچ شریف
تحریک دعوتِ فقر اوچ شریف کی جانب سے محمد طارق سروری قادری کے گھر محفلِ ذکر و نعت اور درسِ شمس الفقرا کا اہتمام کیا گیا۔ محمد طارق سروری قادری اپنے علاقہ میں فقر کا پیغام عام کرنے کے لئے گاہے بگاہے ایسی محافل کا انعقاد کرتے ہیں اور مقامی افراد نہ صرف ان اقدام کو سراہتے ہیں بلکہ اپنی شرکت کے ذریعے انکی بھرپور حوصلہ افزائی بھی کرتے ہیں ۔
* گردونواح سے اہلِ عقیدت افراد کی اللہ کی راہ کی طرف مزید راہنمائی کے لیے 21 جنوری 2019ء بروز سوموار ایک مرتبہ پھر محمد طارق سروری قادری کے گھر پر درس و تدریس کی محفل کا انعقاد کیا گیا۔
* 28 جنوری 2019 بروز سوموار بھائی طارق محمود سروری قاردی کے گھر پر حق کے متلاشی اہلِ محبت افراد کے لیے محفلِ ذکر و نعت اور شمس الفقرا سے درس و تدریس کا اہتمام کیا گیا جس میں اہلِ علاقہ کا جوش و خروش دیدنی تھا۔
(رپورٹ: شہزاد عباد سروری قادری)
تحریک دعوتِ فقر بھروٹ تحصیل سرائے عالمگیر ضلع گجرات
* 18 جنوری 2019ء بروز جمعتہ المبارک تحریک دعوتِ فقر بھروٹ کی جانب سے گاؤں مہے کلاں میں سلطان الفقر پبلیکیشنز کی کتب کا سٹال لگایا گیا۔ سٹال کا مقصد گرد و نواح کے عوام الناس کو اسلام کی حقیقی روح ’فقر‘ کی اہمیت کے متعلق آگاہی فراہم کرنا تھا۔ فقر بنی مکرم صلی اللہ علیہ وآلہٖ وسلم کا ورثہ ہے جس کے متعلق آپ صلی اللہ علیہ وآلہٖ وسلم نے فرمایا ’’فقر میرا فخر ہے اورفقر مجھ سے ہے۔‘‘
سٹال پرسلطان الفقر پبلیکیشنز کی شائع کردہ حضرت سخی سلطان باھُوؒ کی کتب کے انگریزی اور اردو تراجم اور سلطان العاشقین حضرت سخی سلطان محمد نجیب الرحمن مدظلہ الاقدس کی تصانیف اور ان کے انگریزی ترجمے رکھے گئے تھے۔
* یکم فروری 2019ء جمعہ کمبھی گاؤں کی جامع مسجد میں نمازِ جمعہ کے موقعہ پر سلطان الفقر پبلیکیشنز کا سٹال لگایا گیا۔ نماز کی ادائیگی کے بعد کثیر تعداد میں لوگوں نے سٹال پر رکھی گئی کتب کی خریداری کی اور آئندہ بھی ایسی سرگرمیاں جاری رکھنے کی درخواست کی۔
* 8 فروری 2019ء بروز جمعہ جامع مسجد جی ٹی روڈ سرائے عالمگیر میں سلطان الفقر پبلیکیشنز کا سٹال لگایا گیا جسے لوگوں نے بہت سراہا۔ (رپورٹ: یاسر عمران سروری قادری)
تحریک دعوتِ فقر بچیانہ منڈی تحصیل جڑانوالہ فیصل آباد
* 11 جنوری 2019ء بروز جمعہ محمد فاروق سروری قادری کے گھر بھائی محمد فیاض سروری قادری نے مرشد کامل اکمل اور ذکر و تصور اسمِ اللہ ذات کی اہمیت پر درس و تدریس کے فرائض سر انجام دیے اور عوام الناس کو راہِ فقر پر چل کر دین و دنیا کی کامیابیاں سمیٹنے کی دعوت دی۔
* 18 جنوری 2019ء جمعتہ المبارک کے موقع پر غلام شبیر سروری قادری کے گھر پر محفل درس و تدریس کا اہتمام کیا گیا جسے مقامی افراد نے خوب سراہا۔
* یکم فروری 2019ء بروز جمعہ جامع مسجد گلزارِ مدینہ انورکے محل میں درس و تدریس کی محفل منعقد کی گئی۔
تصویری جھلکیاں ملاحظہ فرمائیں۔ (رپورٹ: محمد فیاض سروری قادری)
